نبيل عامر يكتب لماذا اجتماع كريت الآن .. المواجهات القادمه

كتب : بقلم / نبيل عامر
2018-10-11 11:10

خلال 2010 بدأت تتبلور المناطق التى وجد بها غاز بكميات كبيره فى المنطقه سوائا حقل تمار الاسرائيلى اللى تم اكتشافه فى 2010 ,او حقل افروديت القبرصى اللى تم الاتفاق بين شركة نوبل انرجي وقبرص على مشاركتها في استغلال الإنتاج وتطوير الوضع الاقتصادي للقطاع فى حقل افروديت اللى مخزونه 6 تريليون قدم مكعب في أغسطس 2011 .....وفى نفس الوقت اعلن عن حقل لفاثان فى اسرائيل كحقل جديد مخزونه اكتر بكتير من تمار ... وما تم الاتفاق عليه وقتها ان يتم تصدير الغاز القبرصى عن طريق اسرائيل , فيربط حقل افروديت بحقل تمار ويطلع انبوب ساحلى متفاديا المياه التابعه للمناطق الاقتصاديه اللبنانيه والسوريه مرورا بالمياه القبرصيه ومنها الى تركيا لمقابلة خط الغاز اللى بينقل غاز روسيا الى تركيا واللى حتلاقى له خريطه .. هنا .. الخط اللى كان مزمع انشاؤه هو الخط الأزرق المنقط فى الخريطه التاليه التى تحتوى على جميع مربعات التنقيب التابعه لقبرص بناء على اتفاقية ترسيم الحدود من 1 الى 13 ..
ويبقى السؤال ... لو الخط ده ما نفعش أزاى تركيا تأمن خط غاز يوصل اراضيها بدون المرور فى اى مياه اقتصاديه أخرى ؟؟


السؤال ده كان له عامل كبير جدا فى تبلور الرؤيه التركيه للحل , فأخترعت رؤيه بناء على اوهام تساعدها ان تصل للمستطيل الاسود اللى فيه الحقول ده تحديدا للتنقيب عن الغاز فتبقى ضربت عدة عصافير بحجر واحد , اولا : توصل لمستطيل غنى بحقول الغاز ( المستطيل الاسود ) وثانيا: انها لو لقت غاز قريب من المستطيل ده , يتنقل الغاز لأراضيها عن طريق الانبوب البحرى المزمع انشاؤه اللى حيطلع من حقل اسرائيل لتركيا , ثالثا : لو مانفعش الحل ده فلازم يكون هناك حل بديل لعمل خط غاز آخر لا يمر من المياه القبرصيه تصل بيه تركيا لداخل الاراضى التركيه , ثم يتم ربط الخط ده بالخط الاصلى الذى يمربتركيا لنقل الغاز الروسى الى اوربا الموجود حاليا ان وجد ضروره لذلك لأن تركيا انتاجها من الغاز قليل ويمثل 26% من احتياجها وبالتالى اى حقل ستكتشفه سيكون انتاجه للاستهلاك المحلى وليس التصدير لأوروبا ...ولكن اهمية الخط ده ان تصبح تركيا هى ال HUB لغاز المتوسط بالكامل لأنها ضمنت غاز اسرائيل وقبرص يتصدر عن طريقها , فأدعت طريقة ترسيم على خلاف قواعد القانون الدولى تجعلها تصل الى مربع 11 ومربع 10 فى المنطقة الاقتصاديه القبرصيه .. لاحظ الخط الأحمر الذى قسمت به تركيا المنطقه الاقتصاديه لقبرص الى نصفين , ما قبله على اليمين يتبع قبرص وما بعده على الشمال ادعت تركيا انه يتبعها .. وهو اجرام المحتل , فتركيا تحتل الجزء الشمالى من جزيرة قبرص
الخط المزمع انشاؤه لنقل الغاز كان فيه مشكله رئيسيه , وهو انه لازم يعدى من المنطقه الاقتصاديه القبرصيه فقط ويتفادى المنطقه الاقتصاديه اللبنانيه لأن اسرائيل عندها منازعات مع لبنان بخصوص منطقه محدده فى مربعات الحفر عليها نزاع , ويتفادى المنطقه الاقتصاديه السوريه لأن اسرائيل عندها مشكلة الجولان مع سوريا ... وقبول قبرص ان خط اسرائيل يعدى فى منطقتها الاقتصاديه كان مرتبط بنجاح محادثات جنيف بين الجانب التركى والقبرصى لأيجاد حل لمشكلة احتلال تركيا للجزء الشمالى من الجزيره زى ما حتقرى هنا ... المفاوضات فشلت ... فأصبح الحل (الوحيد) البديل لقبرص هو اسالة غازها فى مصر لأن لا احد يمتلك مصانع اساله الا مصر , ومن ثم اعادة تصديره الى اوربا مسال فى تانكات , ولكن العلاقات فى الوقت ده كانت مش ولابد بين مصر وقبرص من ساعة حادثة الطياره فى مطار لارناكا قبلها بسنين كتير ... من له الفضل فى فتح باب النقاش الخلفى بين البلدين كان الله يرحمه ... طارق الباز .. وانا كتبت عنه بوست كامل , ما ساعد على الاسراع بالحل هو ان قبرص طلبت قرض من الاتحاد الاوروبى اثناء ازمتها الماليه , ووافقوا لها على قرض متحفظ جدا قيمته 10 مليار يورو بضمان حقل غازها افروديت زى ما حتقرى ( هنا ) , مع ان قيمة المخزون فى الحقل تتعدى 40 مليار دولار , قبرص تمتلك منها النص تقريبا يعنى 20 مليار دولار والنصف الاخر للشريك الاجنبى , وبناء عليه كان لازم تستخرج غازها بسرعه وتصدر عشان سداد القرض .. وده كان بيمثل عامل ضغط , ولك ان تعرف مثلا ان حقل لفاثان اكتشف فى 2010 وسيتم اول انتاج منه 2020 ... قبرص لم يكن لديها رفاهية الانتظار
وبناء عليه , تركيا بنت تصورها لمنطقتها الاقتصاديه فى 2012 على اوهام لا تتفق مع القانون الدولى مدعيه اشياء تتعلق بالجرف القارى مافيش داعى للدخول فيها ولكنها غير صحيحه تماما , فالمنطقه الاقتصاديه التركيه بناء على القانون الدولى هى اللى باللون البنى فقط فى الخريطه , وهى بعيد عن غاز باقى الدول تماما , ولا احد يعترف بقبرص التركيه فى العالم الا تركيا , وبالتالى اى تنقيب فى المياه الاقتصاديه لشمال الجزيره هو ضد القانون الدولى .. وتصور تركيا لمنطقتها الاقتصاديه تقدر تشوفه فى المقال ( هنا ) بوضوح جدا ... بس ده مقال تركى منحاز لرؤية تركيا ولكن فيه الخريطه دى وتشوف فيها بوضوح رؤية تركيا !!

وهو تعدى صارخ على المناطق الاقتصاديه القبرصيه واليونانيه والمصريه , ففى الخريطه اللى فوق تركيا اقتطعت المنطقه الصفرا دى كلها , من المياه الاقتصاديه لمصر ( 70 كيلومتر ) , ومن المياه الاقتصاديه لليونان ( 50 كيلومتر مربع) , ومن المياه الاقتصاديه لقبرص ( 274 كيلومتر) واعتبرت ان المنطقه الاقتصاديه لقبرص هى فقط تلك المنطقه على شمال الخط الأحمر , والباقى لها كما تبين الخريطه عشان الاسباب اللى قلتها فوق !!! .. فنتج عنها الخريطه دى EEZ as claimed by turky
وستجد انها قطعت حدود اليونان المائيه مع مصر .... جميع المناطق الاقتصاديه محدده بالخط المنقط فى الخريطه اللى فوق والبمبى فى الخريطه دى .. وده كان تصوره فى 2012 قبل ما نلاقى حقل ظهر .. ولهذا السبب لم تصل تركيا واليونان الى اى اتفاق على مناطقهم الاقتصاديه , ونفس الامر بين تركيا ومصر , وطبعا لا يمكن الاتفاق بين تركيا وقبرص , وتركيا رفضت كل اتفاقيات ترسيم الحدود اللى عملتها قبرص مع لبنان ومصر واسرائيل !!!!!
فى مارس 2012 تركيا قدمت هذا التصور لحكومة هشام قنديل , وقدمته الى حكومة قبرص , ثم لا حقا قدمته بشكوى للأمم المتحده فى 2016 بعد ما تأكدت ظنون تركيا ان هذا المستطيل غنى بالغاز بعد ما مصر اعلنت عن حقل ظهر فلا 2015 , وفى نفس الوقت تركيا هددت بوقف كافة تعاملاتها الاستثمارية مع أي شركة تستكشف النفط أو الغاز الطبيعي في المنطقه اللى اعتبرتها من حقها فى المياه الاقتصاديه لقبرص ... شركة إيني لها استثمارات كبيرة في تركيا ومنها مشروع خط أنابيب "بلو ستريم"، لنقل الغاز الطبيعي من روسيا إلى تركيا , وبالتالي فكل ما قبرص تحرز مزيد من التقدم نحو الاستغلال التجاري لاكتشافاتها من الغاز الطبيعي في شرق المتوسط، بمساعدة شركة أيني فتركيا حتضغط عليها ... وده اللى حصل فعلا عند المربع رقم 6 فى مربعات قبرص وهو مربع كاليبسو اللى اينى لقت فيه غاز ولكن السفن الحربيه التركيه منعتها من الحفر فى فبراير الماضى
وضع مصر بعد الثوره والحاله السائله اللى كانت فيها البلد شجع القرد العثمانلى ان يستغل أن الاخوان هم من بيدهم السلطه للدفع بمخططه , فهو اخوانى معتق يعيش حلم الخلافه وعندهم هو خليفتهم المعظم , فضامن انهم حيمشوا له الموضوع لأن مصالح الجماعه فوق اى مصالح ..... وفى نفس الوقت هو محتل الجزء الشمالى من قبرص وقوته اكبر بكتير جدا من قوة قبرص العسكريه , فكان فاكر انه ممكن يفلت بعملته البلطجيه دى لأن الظروف مواتيه له تماما ..... وبكده قبرص تقع بين خيارين كلاهما مر , ان ارادت ترسيم حدودها ترسمها بناء على المقترح التركى , ولو قبرص رفضت الترسيم بناء على احداثياته فده افضل ما يتمنى القرد التركى لأنه ساعتها يقدر يبرطع فى المنطقه زى ماهو عاوز ويستكشف فى نفس المستطيل ده ... ولكن شرفاء مصر من خبرائها فى اعالى البحار اللى ماباعوش ضمايرهم للأخوان , وزارة الدفاع وقتها وكان على رأسها السيسى .... تصدوا للكلام الفارغ ده بقوه لأن حدود الترسيم معروفه من 2003 ولكن لم يتم توقيع الاتفاقيه حتى 2013 ... بعض الأخوان وقف ورى مقترح القرد ومنهم القطب الإخوانى الدكتور خالد عودة المتخصص فى علوم الجيولوجيا , وتفاصيل وخطورة المخطط ده وعدم قانونيته كتبت عنه جريده الوطن ( اضغط هنا ) ... وممكن تشوف تصور تركيا فى موضوع قيم جدا بالانجليزى هنا ... وحتعرف قد ايه هما واخدين من مناطق مصر وقبرص واليونان بمجرد النظر
وعشان كده كان اول شىء تم بعد تولى السيسى الرئاسه هو ترسيم الحدود مع قبرص فى 2013 واعلان الشراكه المصريه القبرصيه اليونانيه لأنها شراكه استراتيجيه تضمن حقوق ال 3 دول ضد بلطجة تركيا اللى عاوزه تستحوذ على 394 كيلومتر مربع اضافيه مقتطعه من مصر وقبرص واليونان
بعد مصر ما لقت حقل ظهر فى 2015 حصل تغير كبير ومهم , لأن النموذج الجيولوجي لحقل ظهر خلق اهتمام كبير بالمربعات البحرية القبرصية القريبه منه , وبعد ما كان الاهتمام بالمربعات 6-8-10 تقريبا انتهى , نجحت جولة التراخيص الثالثة فى 2016 اللى خلالها قبرص منحت إيني (50٪) وتوتال (50٪) فى البلوك رقم 6 واينى اعلنت انها لقت فعلا غاز وتكوينه الجيولوجى مشابه لظهر وغير معروف مخزونه حتى الان , وخدت اينى كل مربع 8 , واكسون موبيل خدت 80% من مربع 10 وقطر للبترول خدت (20 ٪) ... وهنا تركيا تقدمت بشكوى للأمم المتحده فى 2016 بنفس الخريطه اللى قدمتها للأخوان بالظبط .......

, وستجدها مرفقه هنا .. , .....وهنا ..... .. وهنا ....... وهنا ( اضغط بالماوس على كلمة هنا ) , ودى صفحات تقدر تترجمها كلها بزر واحد فى جوجل كروم وكل ما عليك ان تفعله هو ان تضغط على زر.... وبناء عليه حتعرف ان التصور اللى قدموه للأمم المتحده مش سر .. ده معلن ومصر تعرفه وقبرص تعرفه تماما من ساعة تقديمه لمصر فى 2012 اول ما الاخوان مسكوا , واصبح الأمر علنا لأن كلا البلدين يقوموا بعمل عطائات للاستكشاف مع الشركاء الاجانب , واينى لها مربعات استكشاف فى قبرص ومنها مربع كاليبسو وهو رقم 6 فى الخريطه ولقوا فيه عاز فعلا لاحقا واكبر من افروديت ... لاحظ فرق المنطقه الاقتصاديه التركيه بين ما تتخيل تركيا انه من حقها , مع فرق المنطقه الاقتصاديه التركيه فى المربع الاسود الصغير وهو ما تمت عليه الاتفاقيه بين مصر وقبرص , لاحظ كيف تضخمت منطقة الاستغلال بقطع جزء كبير من حقوق قبرص وجزء من حقوق اليونان ووصلت الى خط تماس مع الحدود المصريه المائيه , بكده تفهم لوحدك دور نايل الشافعى اللى ظهر فى اكتوبر 2012 لما عرفوا ان مخطط تركيا سيفشل وحاول التشكيك فى الحدود المائيه مدعيا ان حقل تمار وافروديت يقعوا فى المياه المصريه الاقتصاديه لأن شركته مستفيده من نقل الغاز القبرصى والاسرائيلى عن طريق تركيا .. ولو تم ترسيم الحدود بناء على ماتمسكت به مؤسسات الدوله المصريه وقتها , سيذهب الاتفاق لنقل الغاز القبرصى عن طريق خط الغاز المزمع انشاؤه الى العدم لأن المحادثات الخلفيه بين البلدين كانت قد بدأت بالفعل , فحب يعمل ان الوطنيه بتشر منه وخايف على حقوق مصر .. مع ان الغرض الحقيقي ان ترسيم الحدود يبوظ ومايتمش ... وهو عين ما تريده تركيا
بعد الإطاحة بمرسى ردت تركيا برفضها ترسيم حدودها البحرية مع اليونان بعد 56 جلسه , وطبعا مع قبرص , ورفضت الاعتراف بشرعية الاتفاقيات الخاصة بترسيم المناطق الاقتصادية اللى وقعتها قبرص مع لبنان واسرائيل ومصر
وبذلك اصبحت منطقة النزاع بين قبرص وتركيا هى المنطقه باللون البمبى , ودى المربعات اللى تمتلكها قبرص ولكن تركيا مانعه قبرص من التنقيب فيه حتى بعد ترسيم الحدود مع مصر وبتعتبرها مناطقها ..... ضد القانون الدولى , يعنى المربعات 4-5-6-10 ونص 7 ونص 11 دول اللى تركيا عاوزه تنقب فيهم ... المربع 6 ده مربع كاليبسو .. وفيه غاز بالفعل .. مره تانيه للتذكره

وانت بتشوف الخريطه دى ماتنساش ان حقل ظهر موجود تحت المربع القبرصى رقم 11 مباشرة وقريب جدا من خط التماس بين حدودنا البحريه مع قبرص , وماتنساش ان تركيا عاوزه تنقب فوق راسك لحد اليوم ... اعتراض تركيا لدى الامم المتحده على اتفاقية ترسيم الحدود بين مصر وقبرص معناه ان تركيا كانت ومازالت عاوزه تعمل تنقيب فى المربعات دى كلها واللى مربع 10 و 11 يقعوا على خط التماس مع الحدود البحريه المصرية , وتقدر تبحث فى جوجل تحت العنوان ده بالانجليزى Turkey is questioning the EEZ of Cyprus and Greece at the UN وتقدر تعرف اتجاه تركيا المستقبلى فى التنقيب عن الغاز من هنا


... فى حين ان الترسيم الصحيح الذى تم التوقيع بناء على أسس القانون الدولى يظهر تماما ان تركيا مالهاش اى حدود بحريه مع مصر , ودى الخريطه اللى تم بناء عليها الترسيم فى 2013 , وستجد ان المنطقه الاقتصاديه التركيه وهى المنطقه رقم 7 باللون الطوبى هى المنطقه الاقتصاديه التركيه , وكما ترى انها لا تصل الى مصر مطلقا , وان من لهم حدود اقتصاديه مماسة للحقوق الاقتصاديه المصريه هما قبرص ( منطقه رقم 2) , واليونان ( منطقه رقم 1) , والخط الأصفر هو خط التماس بين المنطقه الاقتصاديه القبرصيه والمنطقه الاقتصاديه المصريه ( منطقه رقم 3)
تقدر تدور فى جوجل برضه تحت عنوان Turkey Formally Challenges in UN Cyprus’ Right to Exclusive Economic Zone
بعد اكتشاف حقل لفاثان بلغ مخزون الغاز الاسرائيلى فى موقع تمار وليفاثان مايقدر بـ 29 تريليون قدم مكعب , وتم اكتشاف حقل ظهر فى 2015 ومخزونه مساوى للحقول الاسرائيليه والقبرصيه مجتمعه .. وعلى الخرايط ستجد ان كل الحقول قريبه من بعضها فى نفس المنطقه تقريبا , وتقدير الخبراء أن احتياطات الغاز التي تتمتع بها منطقة البحر المتوسط مابين مصر وقبرص واليونان وسوريا ولبنان وإسرائيل والأراضي الفلسطينية وتركيا تبلغ أكثر من 370 تريليون قدم مكعب , وهو ثاني أكبر احتياطي في العالم.... كل ما تم اكتشافه مجتمعا فى قبرص واسرائيل ومصر هو 70 تريليون قدم
أما عن الجانب الاسرائيلى..... فبعد توقف امداد الغاز لأسرائيل يعد الثوره , واكتشافه حقل لفاثان , وفشل خط الغاز المزمع انشاؤه للمرور بالمياه الاقتصاديه القبرصيه , قرر رفع قضيتين فى التحكيم الدولى عام 2014 مطالبا ب 4 ملياردولارغرامه وكسبهم ..الغرض منهم كان الضغط على مصر لقبول تسييل غازه .. لأن الغاز فى الارض لا يساوى شىء الا باستخراجه وبيعه ... واسرائيل كانت تلاعب مصر فى ملف سينا وملف الارهاب والابواب الخلفيه المفتوحه عن طريقها لسينا .. عشان تنضف سينا من الارهاب كان لازم قواتك توصل للمناطق منزوعة السلاح , ولا يتم هذا الا بموافقه اسرائيليه بناء على معاهدة السلام ... وعندك محطتين اساله متوقفين عن العمل .. ولذلك قبول مصر اتفاق تسييل الغاز الاسرائيلى مرتبط بمصالح تهم مصر من عدة جهات واهمها احتياج اوروبا لغاز قبرص واسرائيل , وده سبب رئيسى فى موافقة فرنسا على تسليحك بحاملتين طائرات هليكوبتر تحمى بيهم حقولك ... والتقديرات الماليه تقدر قيمة الحقول الاسرائيليه اللى مخزونها 29 تريليون قدم مكعب بما قيمته 220 مليار دولار شامله حصة الشريك الاجنبى ... وده اللى تقدر تشوفه هنا , لو كان قيمة حقول اسرائيل هو 220 مليار دولار ومخزونها 29 تريليون قدم مكعب .. فما هو قيمة حقل ظهر اللى مخزونه يساوى اجمالى مخزون تمار ولفاثان وافروديت مجتمعين وهو 37 تريليون قدم مكعب ؟ حوالى 260 مليار دولار , وبعد خصم حصة الشريك الاجنبى كم يتبقى لمصر ؟ حوالى 150 مليار دولار .. وده طبعا على مدار عدد السنين اللى حتستنفذ فيهم المخزون كله , والتقديرات نتيجة المسح الجيولوجى ان مصر لديها غاز بما قيمته ترليون ومتين مليار دولار ...... عرفت ليه مصر جابت حاملتين طائرات وطيارات رافال .. وليه من فرنسا ؟
فلما اكتب لك ان مصر بعد خمس سنين ودفع مصاريف الشريك الاجنبى سيكون انتاجها من الغاز يوفر لها دخل مثل قناة السويس .. صدق , وده شرحته بالتفصيل هنا .... واعرف ان المستقبل يحتوى على خير , ولما يعلن عن مخزون حقل نور حط فى دماغك ان الدنيا ستختلف كثيرا عما هى عليه ... ده الجزء الكويس
بعد ما عرفت القصه ... ليه اجتماع كريت فى التوقيت ده ؟
التغير الجديد اللى حصل وانا عارف انه حيحصل فى الوقت ده واللى استدعى اجتماع كريت امبارح ..... ان تركيا انهت اعمال المسح , وقررت البدأ فى التنقيب فعليا نهاية اكتوبر كما سترى من الخبر ده اللى لسه نازل من يومين ... قولى معنى الجمله دى ايه ” وقال دونماز: "إن تركيا ستحمي مواردها في البحر المتوسط، النابعة من القانون الدولي"، طبعا انت عرفت تركيا كيف تنظر للقانون الدولى !! ومحللين كتير فى الصحافه الاقتصاديه عالميا قالوا ان شركة البترول الوطنية التركية TPAO تخطط للقيام بأنشطة الاستكشاف في المنطقة المتنازع عليها مع قبرص بمرافقة سفن البحرية التركية ... ودى خريطه تظهر المناطق اللي رخصتها TRNC لشركة TPAO بحروف زرقاء من A إلى G ، والمناطق اللي حصلت شركة GCASC على ترخيص لها الأرقام البرتقالية من 1 إلى 13. يقع الاستكشاف Calypso خارج تراخيص الجانب التركي وخد بالك من الـ F block كويس


فماذا لو قررت تركيا المضى فى التنقيب فى الاماكن دى ؟؟؟ .. أو ان السفن الحربيه لتركيا نزلت لأى مكان فى المربع رقم 11 او 10 ... ؟ مصر حتتصرف ازاى ؟
وازاى مصر واليونان حيتصرفوا لو تركيا اقدمت على التنقيب فى المنطقه الاقتصاديه القبرصيه ؟ ... تفتكر مصر حتشيل ايديها وتسيب اتفاقية ترسيم الحدود تنتهك عينى عينك ؟

ولو تركت تركيا لتنقب فى مياه ليست لها ... ثم وجدت غاز ... كيف ستنقله لأراضيها .. اكيد حتعمل خط ,,, وتأثير ده على وضع مصر المستقبلى ايه كونها اصبحت hup للغاز ... الا يفتح اى خط انابيب تقوم تركيا بعمله فى منطقة المربعات القبرصيه باب خلفى لنقل الغاز الاسرائيلى من حقل لفاثان عن طريقه , عشان كده تركيا قامت بالتصور ده لحدودها المائيه ,,, لأيجاد مكان لخط يمر خارج المياه القبرصيه بادعاء انها مناطق تركيه ... ها !!!!!!
.......... دى تساؤلات اجابتها عند القياده مش عندى
ومع الأزمه الاقتصاديه العويصه التى يواجها القرد اردوغان , فالبنوك المقرضه نفسها فى ازمه ولا يمكن تقرضه , ولو عاوز ياخد قرض ولا اتنين يحل بيهم مشكلته , .. ماهى الضمانات اللى حيقدمها للمقرضين .. الا لو لقى غاز ؟؟ وافتكر قبرص خدت قرضها ازاى وبضمان ايه ..... القرد مستقتل فى موضوع غاز المتوسط ... ومش من مصلحة مصر انه يعمل اى حاجه فى المربعات القبرصيه مطلقا ... ولا استبعد حدوث مناوشات عند محاولات تنقيبه عن الغاز فى الاماكن اللى ضمها لخريطته وهى ليست ملكه ... سميها مناوشات او مواجهات ...... مش حرب .. وأقرى التحليل ده اللى لسه نازل امبارح .. اى نعم فيه خرايط غلط لأن الصحفى اللى عمله ناقل مش فاهم بس المحتوى فيه قدر كبير من الصح .. تقرى الموضوع هنا
القصه دى هى السبب الحقيقى ليه القرد بيكره السيسى كره العما , الصراع الحقيقى مع الاخوان بدأ من مارس 2012 وتحديدا من الموضوع ده واللى لو كانوا استمروا فى الحكم اتفاقية ترسيم الحدود كانت لا يمكن تتم ؟ .. وبما ان اينى ايطاليه , كان لازم علاقة مصر بايطاليا تحديدا تخرب بموضوع ريجينى اللى اتكبر بنفس طريقة خاشقجى ؟.... افتكر ان خالد على كان عاوز يرفع قضيه يلغى بيها اتفاقية الترسيم , مين كان حيديله المعلومات ؟ عرفت ليه اتعمل قانون يمنع الاعتراض على الاتفاقيات الرسميه للحكومه ؟ وأهم من ده كله ...عرفت ازاى مصر وصلت انها تكون hub للغاز بصحيح بدلا عن تركيا ؟
الحل للى بيحصل دلوقتى من تركيا عند القيادات السياسيه لمصر واليونان ... بس داخلين على منطقة مطبات أكيد

بقلم / نبيل عامر

خبير أسواق المال 


Create Account



Log In Your Account