استمع للمقال«عيش و لا دقيق»، انتشرت خلال الأيام الماضية أنباء حول قيام وزارة التموين والتجارة الداخلية بصرف 10 كيلو دقيق شهرياً بدلا من الحصة المعروفة لصرف حصة الخبز المدعم وهي 150 رغيف خبز شهريا لكل مواطن، حسب ما تم تناوله من خلال منصات مواقع التواصل الاجتماعي سيقوم المواطن بصرف حصة الدقيق من المطاحن التابعة للوزارة علي مستوي الجمهورية، وفي التقرير التالي ترصد «عالم المال» آراء المواطنين بشأن صرف الدقيق بدلا من الخبز المدعم.
وفي هذا السياق علقت رشا احمد ربة منزل من محافظة المنوفية، قائلة: «غريب علينا قرار التموين الخاص بصرف الدقيق بدل العيش المدعم، احنا معانا أطفال وحصة العيش من التموين بتسند معانا في الفطار أو الغدا أو ولادنا علي مدار اليوم بياكلوا عيش التموين سندوتشات وادينا بنوفر من الدقيق عشان يكفينا لحد اخر الموسم»، متابعة «احنا كل يوم بنسمع قرار جديد من وزارة التموين عن السلع المدعمة ، الأرز لغوه من التموين وده عمل معانا أزمة لانه سعره الحر غالي ومش كلنا نقدر نجيب أرز حر كل يوم وكمان زجاجة الزيت حجمها صغر بعد ما كانت كيلو بقيت 700 جرام ودلوقت الدقيق مكان الخبز المدعم يا عالم ايه تاني بعد كده.
بينما قالت سهير عاطف موظفة في إحدي مكاتب البريد، «انا معنديش فرن أخبز فيه وكمان متعلمتش أخبز لما استلم حصتي دقيق هعمل بيها ايه هكون مجبرة اني أحدها اوديها المخبز وأصحاب المخابز يتحكموا فينا وبردوا مش مضمون أن صاحب المخبز ياخد الدقيق ويسلمني الكمية كاملة مش جايز يطمع فيها ويبيع منها والناس مبقاش عندها ضمير، ده غير اننا معندناش وقت نروح المخابز احنا يادوب بنلحق نخلص شغلنا عشان نروح نجهز لقمة سريعة مين هيكون عنده وقت يخبز او يروح مخابز ويستني طابور تاني وده كله تكلفته عالية علينا احنا موظفين ومرتباتنا ضعيفة».
وعلي الجانب الآخر قال أحمد علي موظف في أحد المصانع بمدينة السادات، «ياريت يكون قرار التموين اختياري عشان اللي محتاج الخبز ياخد واللي محتاج الدقيق ياخد وكل واحد علي حسب ظروفه وإمكانياته ،والقرار بردوا ينفع بشكل كبير في الأرياف لكن في المدن صعب لأن معظمهم مبيعرفش يخبز عيش ، والعيش ضروري بالنسبة لنا كلنا ».
اما عاطف أنور وهو صاحب مخبز بلدي قال ، «قرار الدقيق أفضل الناس لو فكرت فيه شوية هتلاقي أن شيكارة الدقيق اللي وزنها 10 كيلو دقيق يعملوا ليك كمية كبيرة من العيش وكمان مش عيش وبس من الدقيق انت ممكن تستغل جزء منه حلويات وكيكات وقراقيش وغيرها ، والقرار في النهاية ليخدم الجميع سواء الدقيق هيخدم أهالي الأرياف أو العيش هيخدم أهالي المدن لأن مش متوفر عندهم في الشقق أفران للخبيز وفي النهاية التموين قالت إن القرار اختياري مش إجباري».