علقت الاعلامية لميس الحديدي على واقعة هروب شبل أسد من فيلا سكنية بمنتجع الجونة، شمال الغردقة، من صاحبته، التى كتبت على جروبات المنتجع المختلفة للبحث عنه، وبمشاركة أمن المنتجع والسكان أعادوا الأسد إلى صاحبته.
وقالت لميس الحديدي: “الأسد المرة دي مش في الغابة ولا جنينة الحيوانات.. المرة دي في الجونة ورحلة البحث عن الأسد كانت طويلة والأمن خرج وكل الناس كانت بتدور عليه لحد مالاقوه، والصراحة الموضوع يبدو مضحكا بس هو مش مضحك أوي لأنه طبقا للقانون لا يملك اقتناء أسد”.
https://www.facebook.com/165410476802426/posts/4103619129648188/
وأضافت “الحديدي”، عبر برنامجها “كلمة أخيرة” المذاع على شاشة “ON” قائلة: “أنا مش بتكلم هنا عن مراعاة حريات الناس أو حرية صاحبة الأسد التي قررت اقتنائه ده يخصها لوحدها سواء كانت عايزة الأسد ياكل دراعها أو عيالها أو دراع جوزها أو يلتهم دماغ أي حد لكن الفكرة إنها عايشة داخل مجتمع وداخل الجونة”.
ووجهت رسالة ساخرة لها قائلة: “الجونة تخضع للقوانين المصرية وإوعي تفتكري إنها خارج سياق القانون أو القوانين المصرية هذا جزء من الدولة المصرية التي يطبق عليها القانون المصري والذي ينص عبر قانون البيئة رقم 4 لسنة 1994 وتعديلاته لسنة 2009 وتحظر المادة نفسها حيازة الطيور والحيوانات البرية أو نقلها أو التجول بها حية أو ميتة وده مكانه الغابة أو حديقه الحيوانات لأن حريتك تبدأ عندما تنتهي حرية الآخرين”.