السيسي مداعبًا المواطنين: «بطلوا هري بقى»

طمأن الرئيس عبد الفتاح السيسي، المواطنين على أوضاع الدولة المصرية وعدم الالتفات للشائعات، قائلًا: “يا جماعة اسمعوا مننا مش علشان إحنا أصدق من غيرنا.. ولكن مدركين لحجم التحدي أكثر من غيرنا، والبيانات والحلول بتبقى مطروحة من الدولة، وبالتالي أي اجتهاد من الآخرين ليس مكروه ولا مرفوض ولكن بيعمل بلبلة ويزعج الناس”.

 

أضاف الرئيس السيسي، في كلمة بالمؤتمر الأول للتحالف الوطني للعمل الأهلي التنموي، أن الظروف الموجودة في العالم تضغط على الأوضاع داخل الدول، وبالتالي هذا يضغط على الناس، متابعا: “لو أنا النهارده خوفتكم النتيجة إيه؟ هل لمصلحتكم.. لأ، هل إحنا مانقدرش كدولة وشعب نصمد قدام أي تحدي ولا إيه؟!”.

السيسي: مصر بتدفع ثمن زي كل دول العالم

وأكمل الرئيس السيسي في حديثه للمصريين، قائلا: “لو مصر ظروفها صعبة هنتخلى عنها؟ أنا بكلمكم كلهم.. ولو ظروف مصر صعبة أهل مصر هيتخلوا عنها؟ هو إحنا دخلنا حروب وضيعنا فيها أموال مصر.. ولا إحنا دخلنا مغامرات ضيعنا فيها أموال مصر؟ .. الحرب دي مش بتاعتنا والأزمة مش بتاعتنا.. ولكن مصر بتدفع ثمن زي كل دول العالم.. مختتما حديثه مداعبا المواطنين ضاحكا بالقول: “بطلوا هري بقى”.

 

وأضاف الرئيس السيسي، خلال كلمته في مؤتمر التحالف الوطني للعمل الأهلي التنموي: “بشكركم علشان النجاح.. وبقتوا مثال ونموذج للناس. اللى زيكم يشتغلوا ويشوفوا الأمل وييقي حاجة تفرحنا وتسعدنا.. وأتمني لكم التفوق وأتمني للجميع التوفيق”.

 

وجه الرئيس عبد الفتاح السيسي، الشكر لجمعيات المجتمع الأهلي العاملة داخل مصر، قائلا: “أوجه التحية والتقدير للجمعيات الأهلية.. ومش اللى جوه التحالف بس.. كل الكيانات التي تعمل في العمل الأهلي.. باسمي واسم المصريين.. اشكركم وإحنا محتاجين هذا الدور”.

مؤتمر التحالف الوطني للعمل الأهلي التنموي

وأضاف الرئيس السيسي، خلال كلمته في مؤتمر التحالف الوطني للعمل الأهلي التنموي: “النهارده لما بتكون مؤسسة مجتمع مدني.. بتقوم بدور الحكومة.. مش بتعمله بنفس الكفاءة والاحتراف وإحنا بنعترف بكده.. عندنا 50 ألف جمعية موجودة في مصر.. وكيانات التحالف نحتاج المزيد من الكيانات الأخرى تنضم.. شوفنا الدور المجمع والمحشود والمنسق والمسيطر عليه.. ونتائجه في العروض السابقة على المستوي الاقتصادي والصحي والمستويات الأخرى الاجتماعي.. الجهد المنسق واضح جدا خلال السنة دي”.

 

وتابع الرئيس السيسي: “لازم نشكر كل المساهمين من فضلكم.. سواء من مصر أو خارج مصر.. نوجه لهم التحية ونشكرهم لأن الكلام بيتم من خلال دعم كل إنسان عنده القدرة ومن جوه الخير من خلال القدرة اللى عنده أن المساعدة تصل للناس.. وبالأرقام اللى اتقالت سواء 10 مليارات .. دي أموال متبرعين.. ربنا سبحانه وتعالي يوجه لكم الخير ومحتاجين زيادة”.

 

ويحضر الرئيس عبد الفتاح السيسي، صباح اليوم، مؤتمر التحالف الوطني للعمل الأهلي التنموي”.

تمتلك مؤسسات المجتمع المدني كوادر إدارية وميدانية مدربة ومؤهلة تستطيع تقديم الخدمات

وصرح السفير بسام راضي المتحدث الرسمي باسم رئاسة الجمهورية، بأن التحالف الوطني للعمل الأهلي التنموي، يعد ركناً مهماً في عملية التنمية بالدولة، وداعماً لمنظومة شبكات الحماية الاجتماعية، بتكامل عمله مع جهود الحكومة والقطاع الخاص، بحيث تعمل القطاعات الثلاث من أجل تحقيق التنمية المجتمعية والأنشطة الخدمية لصالح المواطنين على امتداد محافظات مصر، حيث تمتلك مؤسسات المجتمع المدني كوادر إدارية وميدانية مدربة ومؤهلة تستطيع تقديم الخدمات بسرعة وكفاءة عالية، بالإضافة إلى القدرة على الوصول إلى الأسر والفئات المستهدفة وتقديم الخدمات المجتمعية لها في مختلف المحاور.