استمع للمقالشهد الرئيس عبدالفتاح السيسي، اليوم السبت، افتتاح مؤتمر “حكاية وطن بين الرؤية والإنجاز”، الذي تمتد فعالياته على مدار ثلاثة أيام، بالعاصمة الإدارية الجديدة، بمشاركة كوكبة كبيرة من رجال السياسية والاقتصاد وأعضاء البرلمان والإعلاميين وغيرهم من وزراء ومسؤولين.
ورحب رئيس الجمهورية، بالحضور، قائلا: “بنرحب بيكم جميعًا، وسعداء بوجودكم، النهاردة وبكرة وبعده، إن شاء الله هنحكي حكاية بلدنا، وكان فيه حوار وطني أطلقناه السنة اللي فاتت عشان نسمع لبعض”.
وقال الرئيس السيسي خلال دخوله لقاعة المؤتمر: “النهاردة إحنا هنحكيلكم الحكاية بتاعت مصر من 2011 لحد النهارده، عشان تعرفوا وأكيد أنتم عارفين ومتابعين، بس إحنا هنقول من منظور الدولة”، مشيرا إلى أن “قائمة التي تحدث عنها وزير الصناعة والتجارة والتي تتضمن 150 مشروعا استثماريا، ليست بحاجة إلى دراسة جدوى، ويجب علينا كدولة تشجيع الاستثمار في تلك القائمة سواء المصري أو الأجنبي”، مضيفا أن “الدولة على استعداد لتقديم حوافز تشجيعية أكثر للمستثمرين، لأن قائمة الـ150 مشروعا المشار إليها ستوفر في النهاية على الدولة 25 مليار دولار من الفاتورة الاستيرادية”.
وأكد رئيس الجمهورية، أن تلك المشروعات لها دور في خفض الفاتورة الاستيرادية والضغط على الدولار، مشيرا إلى أن الإنفاق بالدولار يشكل عبئا على الدولة، فهناك شراء لمشتقات من البترول بالدولار يتم بيعها بالجنيه، وغيرها من مستلزمات الإنتاج والمواد الغذائية، موضحا أن الدولة المصرية واجهت العديد من التحديات منذ عام 2011 حتى الآن، مضيفا: “لازم تعرفوا يعني إيه دولة وكانت بتواجه تحديدات كبيرة، التحديات دي كانت كفيلة إنها تنهي دول زي ما أنهت دول لغاية دلوقتي موقفتش على حالها”، لافتا “أنا بكرر الكلام ده كتير، والناس بتقولي بتكرر الكلام كتير ليه، بكرره للتذكرة، عشان قدام ربنا أقوله قولت وبدل المرة 100 مرة، البلاد مبتعيش وتكبر وتنمو كده، تكبر بأمل وإخلاص وأمانة وتضحية، مش بالكلام”.
وأفاد السيسي، أن وقت التنمية كانت هناك أبواق تطلق شائعات وتقدح في كل إجراء أو مسار يتم إنجازه، قائلا “أنت كمان مش محل تقدير من ناسك، إللي أنت بتعمل لأجل خاطرهم ولأجل ربنا، لكن لا بأس”، معقبًا: “إحنا شغالين كان بيتم الإساءة لك ولمسئوليك وأسرهم مش هما بس، ولكن لا بأس مفيش حاجة بتروح كله عند ربنا، وكل كلمة كذب لها أجر وكل إساءة ليها أجر، وده مش هيمشي كده إذا كنا بنؤمن بالله وفيه يوم هنقف فيه قدام ربنا، ومش أنا اللي هحاسب اللي هيحاسب ربنا اللي لا بيغفل ولا بينام”.
وأضاف الرئيس السيسي: “مفيش بلاد بتطلع قدام غير بالاستقرار والأمن وأي حد جاهل أو أحمق اللي يقولكم يمكن يعمل بطريقة غير الاستقرار.. أنتم عنيكم على استقرار البلد وبس مين يمسكها مفيش مشكلة، اسمعوا كلامي لو سمحتم أنا واحد منكم وأخوكم طول ما البلد مستقرة ممكن تطلع قدام”، مشيرا: “خسرنا من 2014 حتى الآن 450 مليار دولار وكأن الـ 450 مليار دولار لما تخسرهم ملهمش تأثير، كل أزمة بتتعمل وهتتعمل هيكون ليها تداعيات أوعى تفتكر من 2011 لـ2014 دول حد ادهملنا، لأ الدولة بتدفع من لحم الحي وأنت كمواطن عاوز تعيش وعاوز تربي ولادك وده حقك وإحنا معاك”.