استمع للمقالكل ست شهور وانتوا طيبين بمناسبة متلازمة فبراير واغسطس وتعديل اسهم المؤشر ..معلومات مكررة لابد منها اختصارا للوقت .. الاوزان النسبية لمؤشر السوق الرئيسى EGX30 مش بيتم تعديلها كل 6 شهور .
وانما بشكل لحظى بناء على سعر السهم مضروب فى عدد اسهم الشركة ومش ادارة البورصة اللى بتحطها
الفكرة الاساسية قائمة على انه كلما زاد السعر مع ثبات عدد اسهم الشركة (مع الوضع فى الاعتبار نسبة التداول الحر) ارتفع الوزن النسبى للسهم على المؤشر.. والعكس صحيح.
يعنى الخلاصة فى القيمة السوقية للشركة .. اللى بيأثر فيها فقط هو سعر السهم فى عدد اسهمه (مرجحا بنسبة التداول الحر)
وفكرة المؤشر ده قائمة على ان الشركة اللى قيمتها السوقيه كبيرة لها وزن نسبى كبير.. يعنى الشركة ام مليار جنيه يبقى وزنها اكبر من الشركة اللى قيمتها مليون جنيه !
القصة كلها ان البورصة بتعلن الاوزان النسبيىة كل 6 شهور مع تعديل فبراير واغسطس .. لكن مش بتغيرها او بتحطها بايدها.. فقط تعلنها
الله يمسيه بالخير عبد الرحمن لبيب كان عامل ملف اكسيل بيطلع الوزن النسبى لحظيا بناء على كل تنفيذة للسهم .. لان زى ما قلنا .. اى تغيير فى السعر معناه تغيير فى القيمة السوقية للشركة
التعديل اللى تم .. متعلق بمعايير الادراج على المؤشر ومعادلة نسب التداول الحر .. طب ليه؟؟ عشان يضمن ان الشركات المدرجة ذات سيولة مرتفعة ونسبة تداول حر مقارنة بالقيمة السوقية مرتفعة .. يعنى مش مجرد تنفيذة او صفقة تمت بشكل استثنائى ان يتم التأثير على المؤشر بشكل غير حقيقى
وكمان عشان استقرار مكونات المؤشر دون تغيير ناتج من اداء غير واقعى ايضا لبعض الشركات ..
ان مثلا سهم يعمل تنفيذات كبيرة فى فترة استثنائية وبالتالى يستوفى شرط السيولة ولكنه اصلا غير نشط بقية الفترة (الستة اشهر) مما يعنى انه اصبح مؤهل للادراج لاستيفائه هذا الشرط (على غير الواقع)
فكرة المؤشر والتعديل اللى بيتم كل ستة اشهر شبيه بجدول الدورى العام .. كل سنة اخر 3 فرق فى الجدول بتهبط.. واول 3 فرق فى القسم الثانى بالدورى بتصعد المشكله ان المعايير اللى بتصعد عليها الفرق الثلاثه من القسم الثانى كانت بتسمح انه فرقة تكسب 3 ماتشات ورا بعض ومش مهم الباقى تصعد للدرجة الاولى (كمثال) .. فالتعديلات الحالية عايزة تضمن ان الفرقة ديه لعبت كل الماتشات واتعرضت لنفس ظروف الفرق الاخرى عشان تستحق تصعد للدرجة الاولى ..
فى السابق كان ممكن تهبط 5 – 6 فرق ويصعد بدالهم من القسم الثانى ولكن عشان ضمان استقرار المؤشر وانه يكون معبر بشكل اكبر .. هنتبع قاعدة الثلاث فرق بتوع الدورى كده يعنى 3 يهبطوا و3 يصعدوا .. طب الثلاثة اللى هيصعدوا دول هييجوا منين؟
هنشوف اول 6 فى دورى القسم الثانى ونعمل بينهم دورة مجمعة وناخد اول 3 يصعدوا للقسم الاول
طب بعد كل ده .. هل تم اجراء اى تعديل فى المفهوم الاساسى للمؤشر انه مرجح بالاوزان النسبيىة المبنية على القيمة السوقية؟ Market Capitalization
يعنى هل البورصة غيرت طريقة الحساب الى المؤشر السعرى او القائم على النسبة المؤية او غير الموزون او حتى عدلت الاوزان ؟
لأ لم يحدث ..
طب وبعدين؟؟ امتى بقى المؤشر مش هيبقى التجارى الدولى بس؟؟
تانى .. المشكلة مش فى طريقة الحساب .. المشكله فى عدد الشركات الكبيرة ذات الراس مال السوقى الكبير .. احنا معندناش فى البورصة غير التجارى كرأس مال سوقى ضخم والباقى اقل .
فالحل .. لازم تزيد عدد الشركات اللى قيمتها السوقية كبيرة عشان تتناسب مع التجارى وبالتالى يتوزع الوزن النسبى
اهمية التعديلات ديه فى ان الاسهم المكونة للمؤشر هتكون منتقاة بعناية تضمن اكبر تعبير عن السوق وده المهم فى الوقت الحالى
طب هل التعديلات الاخيرة لها تأثير على السوق ؟؟ … مش هرد عشان محدش يزعل ..
تقولش المؤشر بيطير كل يوم وبقية الاسهم ميته وعشان كده الناس زعلانه؟؟.. ده هو اللى مات اساسا !!